22 Feb 2012
தளிப்பரம்பு(கேரளா):முஸ்லிம் லீக்கின் முன்னணி அமைப்பான எம்.எஸ்.எஃபின் உள்ளூர் தலைவர் அப்துல் ஷுக்கூரின் கொலையை கண்டித்து ஐக்கிய ஜனநாயக கூட்டணியும், மார்க்சிய கம்யூனிஸ்ட் கட்சியின் மாவட்ட செயலாளர் பி.ஜெயராஜன் மற்றும் டி.வி.ராஜேஷ் எம்.எல்.ஏ ஆகியோர் மீதான தாக்குதல் முயற்சியை கண்டித்தும் கண்ணூர் மாவட்டத்தில் நடந்த முழு அடைப்பில் வன்முறை சம்பவங்கள் நிகழ்ந்துள்ளன.
தளிப்பரம்பு அரியல் என்ற இடத்தில் மார்க்சிய கம்யூ. தொண்டர் அரிவாளால் வெட்டப்பட்டார். சிகிட்சைக்காக இவர் மருத்துவமனையில் சேர்க்கப்பட்டுள்ளார்.
நேற்று முன்தினம் கொல்லப்பட்ட அப்துல் ஷுக்கூரின் உடல் அரியல் ஜும்மா மஜ்தில் அடக்கம் செய்யப்பட்டது.
இந்நிலையில், அப்துல் ஷூக்கூரின் இறுதிச்சடங்கில் கலந்துகொள்ள வந்த கெ.எம்.ஷாஜி எம்.எல்.ஏவின் காரின் மீது கல்வீச்சு நடந்தது. முஸ்லிம் லீக் தலைவர்கள் பயணித்த வாகனத்தின் மீது குண்டு வீசப்பட்டதாக புகார் எழுந்தது. ஆனால் எவருக்கும் காயம் ஏற்படவில்லை. முஸ்லிம் லீக் மற்றும் சி.பி.எம் உறுப்பினர்களின் வீடுகள் மீது கல்வீச்சு நடத்தப்பட்டது.
வன்முறையில் ஈடுபட்டவர்களை கலைப்பதற்கு போலீஸ் க்ரேனேடு பிரயோகித்தது. மாவட்டத்தின் பல இடங்களில் தடை உத்தரவு நீடிக்கிறது. அப்துல் ஷுக்கூர் கொலை தொடர்பாக 50 க்கும் மேற்பட்ட சி.பி.எம் உறுப்பினர்களை போலீஸ் கைது செய்துள்ளது.
நன்றி தூது ஆன்லைன்
